ກອງທັບລາວໄດ້ຫຼຽນຄຳປະຫວັດສາດ ຫຼຽນທຳອິດ ຈາກການແຂ່ງຂັນຍິງປືນກອງທັບອາຊຽນ

ຜົນງານໃນການເຂົ້າຮ່ວມແຂ່ງຂັນຍິງປືນຊີງແຊັມກອງທັບບົກອາຊຽນ ໃນວັນທີ 21 ພະຈິກ 2015 ນີ້ ນັກຍິງປືນກອງທັບປະຊາຊົນລາວ ສາມາດຍາດໄດ້ຫຼຽນຄຳເປັນຫຼຽນທຳອິດຂອງ ສປປ ລາວ ນັບແຕ່ໄດ້ເຂົ້າຮ່ວມແຂ່ງຂັນສິບກວ່າປີຜ່ານມາ ນອກນີ້ຍັງໄດ້ຂັນຊະນະເລີດ ເຊິ່ງທັງສອງລາງວັນນີ້ ແມ່ນໄດ້ມາຈາກທີມປືນສັ້ນຊາຍໃນຄູ່ 5 ຫຼືວ່າປະເພດບົດຍິງຈາກບົດທີຫ້າ ເຊິ່ງກະຕິກາການແຂ່ງຂັນແມ່ນຈະຄັດເອົາທິມທີ່ຍິງໄວ ແລະ ແມ່ນຢຳຈາກ 10 ປະເທດ ຄັດເອົາ 6 ຈາກ 6 ຄັດເອົາ 4 ແລະ ຈາກ 4 ຄັດເອົາ 2 ທີມໄປຊີງຊະນະເລີດ ໂດຍໃນຮອບຄັດເລືອກນັ້ນ ທິມຊາດລາວ ຊະນະທິມເຕັງ ໄທ ຕົກຮອບທຳອິດ ແລ້ວຜ່ານ ສິງກະໂປ ອິນໂດເນເຊຍ ມາເລເຊຍ ແລະ ຮອງຊິງຊະນະເລີດ ກໍ່ເອົາຊະນະປະເທດຟິລິບປິນດ້ວຍຄວາມໄວ ໃນການຍິງ 15 ວິນາທີ 78 ລິບດາຕໍ່ 15 ວິນາທີ 91 ລິບດາ ໄດ້ຄອງຫລຽນຄຳຫລຽນທຳອິດໃນປະຫວັດສາດ.
ນັບແຕ່ກອງທັບປະຊາຊົນລາວ ໄດ້ເຂົ້າຮ່ວມແຂ່ງຂັນ ກີລາຍິງປືນກອງທັບບົກອາຊຽນ ຄັ້ງທຳອິດໃນປີ 1999 ຈົນມາຮອດປີ 2014 ສປປ ລາວ ຄອງອັນດັບທີ 9 ໃນສິບປະເທດອາຊຽນເລື້ອຍໆມາ ຕົກມາໃນປີ 2015 ກະຊວງປ້ອງກັນປະເທດ ເຫັນໄດ້ບົດບາດ ແລະ ຄວາມສຳຄັນຂອງການເຂົ້າຮ່ວມໃນລາຍການແຂ່ງຂັນດັ່ງກ່າວ ຈຶ່ງໄດ້ປະກອບປືນໃໝ່ທີ່ນຳເຂົ້າຈາກສາທາລະນະລັດອິນໂດເນເຊຍ ຍ້ອນລາຍການແຂ່ງຂັນດັ່ງກ່າວນີ້ ມັນເປັນການແລກປ່ຽນບົດຮຽນທາງດ້ານລະດັບຄວາມສາມາດ ໃນການນຳໃຊ້ອາວຸດຍຸດໂທປະກອນ ແລະ ເພື່ອເປົ້າໝາຍການລວມຕົວກັນເຂົ້າເປັນປະຊາຄົມອາຊຽນ ທີ່ເຂັ້ມແຂງໃນທ້າຍປີນີ້