ກອງກວດກາປ່າໄມ້ແຂວງສະຫວັນນະເຂດຈັດກິດຈະກຳເຜີຍແຜ່ກົດໝາຍວ່າດ້ວຍສັດນ້ຳ-ສັດປ່າ

ກົມກວດກາປ່າໄມ້ ກະຊວງກະສິກຳ-ປ່າໄມ້ ຮ່ວມກັບ ກອງກວດກາປ່າໄມ້ແຂວງສະຫວັນນະເຂດ ໄດ້ຈັດກິດຈະກຳ ເຜີຍແຜ່ກົດໝາຍ ວ່າດ້ວຍສັດນ້ຳ ແລະສັດປ່າ ເຊິ່ງພິທີດັ່ງກ່າວ ໄດ້ຈັດຂຶ້ນທີ່ວັດບ້ານຊອກ ເມືອງໄກສອນພົມວິຫານ ໂດຍມີທ່ານ ນາງ ສີທອງ ພິມມະນີ ຮອງຫົວໜ້າພະແນກບໍລິຫານ ກົມກວດກາປ່າໄມ້ ກະຊວງກະສິກຳ-ປ່າໄມ້ ແລະທ່ານ ສູນທອນ ເທບປັນຍາ ຫົວໜ້າໜ່ວຍງານບໍລິຫານ-ຈັດຕັ້ງ ກອງກວດກາປ່າໄມ້, ພ້ອມດ້ວຍພະນັກງານວິຊາການ, ອຳນາດການປົກຄອງບ້ານ, ເຖົ້າແກ່ແນວໂຮມ, ນັກຮຽນມັດທະຍົມສົມບູນ ແລະປະຖົມສົມບູນເຂົ້າຮ່ວມ.
ໃນໂອກາດດັ່ງກ່າວ ທ່ານ ນາງ ໜູນາງ ແສງເຮືອງຊົມພູ ນາຍບ້ານໆຊອກ ກໍ່ໄດ້ລາຍງານສະພາບການຂອງບ້ານໃຫ້ຮູ້ໂດຍສັງເຂບ, ຈາກນັ້ນ ທ່ານ ສູນທອນ ກໍ່ໄດ້ຍົກໃຫ້ເຫັນເຖິງຈຸດປະສົງໃນການເຜີຍແຜ່ ກົດໝາຍດັ່ງກ່າວນັ້ນ ກໍ່ຍ້ອນວ່າ ຍາກໃຫ້ພໍ່ແມ່ປະຊາຊົນ ກໍ່ຄືນ້ອງນັກຮຽນ ໄດ້ຮັບຮູ້ເຖິງຄວາມໝາຍ ຄວາມສຳຄັນ, ສິດ ແລະໜ້າທີ່ຂອງອົງການກວດກາປ່າໄມ້ ແລະທີ່ດິນປ່າໄມ້, ສິດໜ້າທີ່ຂອງເຈົ້າໜ້າທີ່ປ່າໄມ້, ຮູບການກວດກາປ່າໄມ້ ແລະທີ່ດິນປ່າໄມ້ ແລະອື່ນໆ. ເຊິ່ງກົດໝາຍສະບັບນີ້ ໄດ້ມີການປັບປຸງໃໝ່ ແລະໄດ້ຖືກຮັບຮອງເອົາໃນວັນທີ 24 ທັນວາ 2007 ໂດຍສະພາແຫ່ງຊາດ. ປະກອບມີ 12 ພາກ 130 ມາດຕາ. ໃນໂອກາດດັ່ງກ່າວ ທາງເຈົ້າໜ້າທີ່ກອງກວດກາປ່າໄມ້ແຂວງ ຍັງໄດ້ຍົກໃຫ້ເຫັນບາງມາດຕາທີ່ສຳຄັນ ຂອງກົດໝາຍສະບັບນີ້ ເປັນຕົ້ນ: ມາດຕາ 110,111,112 ທີ່ໄດ້ເວົ້າເຖິງສິດ ຂອງອົງການກວດກາປ່າໄມ້ ເຊິ່ງປະກອບດ້ວຍ 7 ສິດ ແລະສິດຂອງເຈົ້າໜ້າທີ່ປ່າໄມ້ ປະກອບດ້ວຍ 6 ສິດ, ນອກນັ້ນ ໃນມາດຕາ 115 ຍັງໄດ້ຍົກໃຫ້ເຫັນເຖິງຮູບການກວດກາປ່າໄມ້ ແລະທີ່ດິນປ່າໄມ້ ປະກອບມີ 3 ຮູບການຄື: ການກວດກາຕາມປົກກະຕິ, ການກວດກາໂດຍມີການແຈ້ງລ່ວງໜ້າ ແລະການກວດກາແບບກະທັນຫັນ, ສ່ວນມາດຕາ 116 ການກວດກາພາຍນອກ ປະກອບມີ 3 ພາກສ່ວນຄື: ສະພາແຫ່ງຊາດ, ອົງການກວດກາລັດ ແລະການຕິດຕາມກວດກາຂອງພົນລະເມືອງລາວ, ການຈັດຕັ້ງ-ບຸກຄົນ. ທັງນີ້ ກໍ່ເພື່ອເຮັດໃຫ້ອຳນາດການປົກຄອງ, ພໍ່ແມ່ປະຊາຊົນ ກໍ່ຄືນ້ອງນ້ອຍນັກຮຽນ ໄດ້ຮູ້ແຈ້ງເຖິງກົດໝາຍທີ່ກ່າວມານັ້ນ
ໃນການຈັດກິດຈະກຳຄັ້ງນີ້ ຜູ້ເຂົ້າຮ່ວມຍັງໄດ້ມີການຖາມ-ຕອບ ກ່ຽວກັບກົດໝາຍວ່າດ້ວຍສັດນ້ຳ ແລະສັດປ່າ ໂດຍສະເພາະນ້ອງນ້ອຍນັກຮຽນ ທີ່ໄດ້ຮ່ວມກິດຈະກຳດ້ວຍບັນຍາກາດຟົດຟື້ນ ແລະເຕັມໄປດ້ວຍເນື້ອໃນ.