ກວດເຫັນລາຍຮັບທີ່ບໍ່ມອບເຂົ້າງົບປະມານ 800 ຕື້ກວ່າກີບ

ການເກັບລາຍຮັບເຂົ້າງົບປະມານແຫ່ງລັດ ໃນໄລຍະຜ່ານມາແມ່ນມີຫຼາຍໆ ປາກົດການຫຍໍ້ທໍ້ທີ່ເກີດໃນຂະແໜງການເງິນ ຊຶ່ງເປັນບັນຫາທີ່ເຮັດໃຫ້ການເກັບລາຍຮັບເຂົ້າງົບປະມານບໍ່ໄດ້ຕາມ ແຜນການທີ່ວາງໄວ້ຂະນະທີ່ອົງການກວດສອບແຫ່ງລັດກວດເຫັນບັນດາກະຊວງ, ແຂວງ ແລະ ນະຄອນຫຼວງເກັບລາຍຮັບໄດ້ແລ້ວບໍ່ມອບເຂົ້າງົບປະມານ ຂອງລັດມີມູນຄ່າສູງເຖິງ 800 ຕື້ກວ່າກີບ.

ວັນທີ 11 ມັງກອນຜ່ານມາອົງການ ກວດສອບແຫ່ງລັດໄດ້ຈັດກອງປະຊຸມ ເປີດກວ້າງວຽກງານກວດສອບງົບປະມານແຫ່ງລັດປະຈຳປີ 2016 ໂດຍພາຍໃຕ້ການເປັນປະທານຂອງ ທ່ານນາງ ວຽງທອງ ສີພັນດອນ ປະທານອົງການກວດສອບແຫ່ງລັດ, ມີບັນດາຮອງລັດຖະມົນຕີ, ຮອງເຈົ້າຄອງ, ຮອງເຈົ້າແຂວງ ພ້ອມດ້ວຍບັນດາຫົວໜ້າພະແນກການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານນາງ ວຽງທອງ ສີພັນດອນ ກ່າວເປີດກອງປະຊຸມວ່າ: ກອງປະຊຸມຄັ້ງນີ້ແມ່ນຈະໄດ້ທົບທວນຄືນຜົນການກວດສອບກ່ຽວກັບການຄຸ້ມຄອງ ແລະການນຳໃຊ້ງົບປະມານແຫ່ງລັດ ປະຈຳສົກປີ 2014-2015, ຮັບຟັງການສະຫຼຸບການເຄື່ອນໄຫວວຽກງານ

ຂອງອົງການກວດສອບແຫ່ງລັດປະຈຳ ປີ 2015-2016 ແລະທິດທາງແຜນປີ 2017, ທັງນີ້ກໍເພື່ອເຮັດໃຫ້ມີຄວາມ ເປັນເອກະພາບໃນການຈັດຕັ້ງປະຕິບັດ ໃຫ້ສອດຄ່ອງກັບກົດໝາຍວ່າດ້ວຍການກວດສອບແຫ່ງລັດເປັນຕົ້ນແມ່ນການ ປັບປຸງແກ້ໄຂຕາມການແນະນຳຜົນກວດ ສອບທີ່ໄດ້ແຈ້ງໃຫ້ບັນດາກະຊວງ, ອົງ ການ, ບັນດາແຂວງ ແລະນະຄອນຫຼວງ ເພື່ອເປັນບ່ອນອີງໃຫ້ອົງການກວດສອບ ໄດ້ທົບທວນຄືນການປະຕິບັດມາດຕະ ການ ແນະນຳປັບປຸງແກ້ໄຂໃຫ້ມີຄວາມ ຄືບໜ້າທັງເປັນບ່ອນອີງໃຫ້ອົງການ ກວດສອບແຫ່ງລັດສາມາດນຳໃຊ້ສ້າງ ແຜນກວດສອບໃນປີຕໍ່ໄປໃຫ້ມີຄວາມ ຊັດເຈນ.

ຊຶ່ງໃນສົກປີ 2014-2015 ອົງການ ກວດສອບແຫ່ງລັດກວດເຫັນລາຍຮັບສ່ວຍສາອາກອນ, ລາຍຮັບຊັບສິນຂອງລັດ, ເງິນກອງທຶນລັດ ແລະລາຍຮັບອື່ນໆ ຈຳນວນ 814 ຕື້ກີບ ໂດຍບັນດາກະຊວງ, ແຂວງ ແລະນະຄອນຫຼວງເກັບໄດ້ ແລ້ວແຕ່ບໍ່ມອບເຂົ້າງົບປະມານແຫ່ງລັດ, ນອກນັ້ນ ຍັງກວດເຫັນການຊຳລະໜີ້ສິນໂຄງການລົງທຶນຂອງລັດດ້ວຍຮູບການອວ່າຍໜີ້ 3 ແຈ ຈຳນວນ 827 ຕື້ກີບ ທີ່ຊຳລະບໍ່ຖືກຕ້ອງກັບການກຳນົດເງື່ອນໄຂເຊັ່ນ: ໂຄງການບໍ່ໄດ້ປະເມີນ, ວຽກບໍ່ສຳເລັດ 100%, ບໍ່ໄດ້ຄິດໄລ່ອາກອນ ແລະອື່ນໆ.

ຂະນະດຽວກັນ ໃນສົກປີ 2015-2016 ອົງການກວດສອບໄດ້ຂຶ້ນແຜນກວດສອບ 89 ເປົ້າໝາຍ, ດຳເນີນການກວດສອບຕົວຈິງ 93 ເປົ້າໝາຍ ໂດຍໄດ້ສຳເລັດການກວດສອບຕາມແຜນ 89 ເປົ້າໝາຍ ຊຶ່ງໃນຈຳນວນເປົ້າໝາຍດັ່ງ ກ່າວນັ້ນ ມີບັນດາກະຊວງ ແລະອົງການ 12 ຫົວໜ່ວຍ, ກົມທີ່ກ່ຽວຂ້ອງ 13 ຫົວໜ່ວຍ, ແຂວງ-ນະຄອນຫຼວງ 17 ຫົວໜ່ວຍ, ຄັງເງິນແຫ່ງຊາດປະຈຳແຂວງ 3 ຫົວໜ່ວຍ, ທະນາຄານລັດ 4 ຫົວໜ່ວຍ, ວິສາຫະກິດລັດ 14 ຫົວໜ່ວຍ, ໂຄງການກູ້ຢືມ ແລະຊ່ວຍເຫຼືອລ້າຈາກຕ່າງປະເທດ 26 ຫົວໜ່ວຍ ແລະກວດສອບຕາມຄຳສະເໜີ 4 ເປົ້າໝາຍ.

 

ທີ່ມາ: ເສດຖະກິດ-ສັງຄົມ

ບົດຄວາມໃຫມ່ໆ