ກວດຄົ້ນເຮືອນພັກ ພົບເຮໂຣອິນ 30 ແທ່ງ ພ້ອມຢາບ້າ 156.000 ກວ່າເມັດ

ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງອຸດົມໄຊ ເປີດເຜີຍໃຫ້ຮູ້ວ່າ: ຄະດີດັ່ງກ່າວນີ້, ໄດ້ຕິດຕາມ ແລະ ເກັບກໍາຂໍ້ມູນຫຼັກຖານເປັນເວລາ 4 ເດືອນ ຈຶ່ງສາມາດຮູ້ຂໍ້ມູນຫຼັກຖານລະອຽດຊັດເຈນວ່າ ພວກກ່ຽວກໍາລັງລັກລອບເຄື່ອນໄຫວເອົາຢາເສບຕິດເຂົ້າພັກຢູ່ເຮືອນພັກແຫ່ງໜຶ່ງ ຢູ່ບ້ານໜອງແມງດາ ເມືອງໄຊ ກຽມອອກຂາຍ; ຮອດຄືນຂອງວັນທີ 1 ມິຖຸນາ 2017 ຈຶ່ງນໍາກໍາລັງເຂົ້າຈັບກຸມ ພ້ອມທັງກວດຄົ້ນ, ຜ່ານການກວດຄົ້ນພົບຢາເສບຕິດ ປະເພດເຮໂຣອິນ ຈຳນວນ 30 ແທ່ງ, ນ້ຳໜັກ 11,5 ກິໂລກຼາມ, ຢາບ້າ ຈຳນວນ 78 ມັດ ກັບ 48 ເມັດ, ນ້ຳໜັກ 19 ກິໂລກຼາມ, ລວມມີຢາບ້າທັງໝົດ 156.048 ເມັດ, ລົດກະບະອີຊູຊຸ ດີແມັກ ສີປອນທອງທະບຽນ 9389 ນະຄອນຫຼວງວຽງຈັນ ຈຳນວນ 1 ຄັນ, ເງິນກີບ ຈຳນວນ 35.000.000 ກີບ ແລະ ໂທລະສັບມືຖື ຈຳນວນ 2 ເຄື່ອງ ພ້ອມກັກຕົວຜູ້ຖືກຫາ 2 ຄົນ ຄື: ທ້າວຫວ່າ ເມັງ ວ່າ ອາຍຸ 33 ປີ ຢູ່ບ້ານສວນຢາ ເມືອງຫຼວງນ້ຳທາ ແຂວງຫຼວງນ້ຳທາ ແລະ ທ້າວ ຮືຈີຢາງ ອາຍຸ 29 ປີ ຢູ່ບ້ານໄຊອຸດົມ ເມືອງຜາອຸດົມ ແຂວງບໍ່ແກ້ວ.

Cr: ໜັງສືພິມຄວາມສະຫງົບ LSecurity News