ກວດຄົ້ນຫ້ອງພັກເປົ້າໝາຍ ພົບຢາເສບຕິດຫຼາຍລາຍການ

ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ນະຄອນຫຼວງວຽງຈັນ, ໄດ້ເຂົ້າກວດຄົ້ນຫ້ອງພັກເປົ້າໝາຍຄ້າຂາຍຢາເສບຕິດ ຢູ່ໂຮງແຮມແຫ່ງໜຶ່ງ ເຂດບ້ານດົງນາໂຊກໃຕ້ ເມືອງສີໂຄດຕະບອງ ນະຄອນຫຼວງວຽງຈັນ ສາມາດກັກຕົວຜູ້ຖືກຫາໄດ້ 4 ຄົນ ພ້ອມຂອງກາງຢາເສບຕິດໄດ້ຫຼາຍລາຍການ ໃນນີ້ ຢາບ້າ 6.000 ເມັດ, ຢາໄອສ໌ 1 ຖົງ ແລະ ເຮໂຣອິນ 1 ແທ່ງ,ໄປສອບສວນຂະຫຍາຍຜົນ.

ເຈົ້າໜ້າທີ່ວິຊາສະເພາະ ປກສ ນະຄອນຫຼວງວຽງຈັນ ໃຫ້ຮູ້ວ່າ: ພາຍຫຼັງໄດ້ສືບຮູ້ວ່າ ໃນວັນທີ 16 ພຶດສະພາ 2018 ມີກຸ່ມແກ້ງຄ້າຂາຍຢາເສບຕິດຈໍານວນໜຶ່ງນັດຊື້-ຂາຍໃຫ້ກັນຢູ່ໂຮງແຮມແຫ່ງໜຶ່ງ ເຂດບ້ານດົງນາໂຊກໃຕ້ ເມືອງສີໂຄດຕະບອງ. ຈາກນັ້ນ, ຈຶ່ງນຳກຳລັງເຂົ້າກວດຄົ້ນຫ້ອງພັກຢູ່ໂຮງແຮມຫຼັງດັ່ງກ່າວ. ຜ່ານການກວດຄົ້ນ ພົບເຫັນຢາເສບຕິດຫຼາຍລາຍການ ລວມມີຢາບ້າ 6.000 ເມັດ, ຢາໄອສ໌ 1 ຖົງ ໜັກ 1 ກິໂລກຼາມ ແລະ ເຮໂຣອິນ 1 ແທ່ງ ພ້ອມທັງກັກຕົວຜູ້ຖືກຫາໄດ້ 4 ຄົນ ຊື່ ທ້າວ ອ່ອນຈັນ ອາຍຸ 47 ປີ, ທ້າວ ຫວັນ ອາຍຸ 47 ປີ ທັງສອງຢູ່ບ້ານຫ້ວຍຊາຍໃຕ້, ທ້າວ ສົມບັດ ອາຍຸ 32 ປີ ຢູ່ບ້ານມັກກະຈອກ ທັງສາມຄົນຢູ່ເມືອງຫ້ວຍຊາຍ ແຂວງບໍ່ແກ້ວ ແລະ ທ້າວ ແຈນ ອາຍຸ 27 ປີ ພັກເຊົາຢູ່ບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ ໄປສອບສວນ.

ຜ່ານການສອບສວນ ພວກກ່ຽວໃຫ້ຮັບສາລະພາບວ່າ: ໄດ້ຮ່ວມກັນເຄື່ອນໄຫວລັກລອບຊື້-ຂາຍຢາເສບຕິດ ປະເພດຢາບ້າ, ຢາໄອສ໌ ແລະ ເຮໂຣອິນ ມາແຕ່ຕົ້ນເດືອນມີນາ 2018 ສ່ວນຫຼາຍແມ່ນສັ່ງຊື້ນໍາຄົນປະເທດມຽນມາ. ໃນນີ້, ຊື້-ຂາຍຢາເຮໂຣອິນມາແລ້ວ 3-4 ຄັ້ງ ຄັ້ງລະ 5-10 ແທ່ງ, ຢາໄອສ໌ 2 ຄັ້ງ ຄັ້ງລະ 1 ກິໂລກຼາມ ແລະ ຢາບ້າຫຼາຍຄັ້ງໆລະ 6.000-10.000 ເມັດ. ມາວັນທີ 14 ພຶດສະພາ 2018, ມີຜູ້ຮ່ວມຂະບວນການນໍາກັນໂທລະສັບມາສັ່ງຊື້ເຮໂຣອິນ 1 ແທ່ງ, ຢາໄອສ໌ 1 ກິໂລກຼາມ ແລະ ຢາບ້າ 6.000 ເມັດ.

ຈາກນັ້ນ, ໄດ້ສັ່ງຊື້ຢາເສບຕິດຈຳນວນດັ່ງກ່າວນັ້ນນຳຄົນມຽນມາ ພ້ອມທັງບອກຈຸດຊື້-ຂາຍຢູ່ໂຮງແຮມເຂດບ້ານດົງນາໂຊກໃຕ້ ເມືອງສີໂຄດຕະບອງ. ພາຍຫຼັງໄດ້ຢາເສບຕິດຈໍານວນດັ່ງກ່າວແລ້ວ ມາວັນທີ 16 ພຶດສະພາ 2018 ຈຶ່ງນໍາຢາເສບຕິດຈໍານວນດັ່ງກ່າວໄປໃຫ້ເຄືອຂ່າຍດຽວກັນທີ່ສັ່ງຊື້ກ່ອນໜ້ານີ້ ໂດຍນັດສົ່ງໃຫ້ກັນຢູ່ໜ້າໂຮງແຮມຫຼັງດັ່ງກ່າວ. ຈາກນັ້ນ, ທ້າວ ອ່ອນຈັນ ຈຶ່ງຍ່າງອອກມາ ພ້ອມທັງຖືເອົາຢາເຮໂຣອິນ 1 ແທ່ງ, ອອກໄປໃຫ້ຜູ້ສັ່ງຊື້ເບິ່ງ ພ້ອມທັງບອກວ່າ ທີ່ເຫຼືອແມ່ນໃຫ້ເຂົາໄປເອົາຢູ່ຫ້ອງພັກໃນໂຮງແຮມ.

ໃນລະຫວ່າງຍ່າງກັບຫ້ອງພັກນັ້ນ ທ້າວ ອ່ອນ ເຫັນເຈົ້າໜ້າທີ່ຕໍາຫຼວດຢູ່ແວດລ້ອມໂຮງແຮມຫຼັງດັ່ງກ່າວ, ທ້າວ ອ່ອນຈັນ ຈຶ່ງແລ່ນໜີແລ້ວຖິ້ມເຮໂຣອິນ 1 ແທ່ງ ລົງຂ້າງທາງ ແຕ່ມີເຈົ້າໜ້າທີ່ເຂົ້າກັກຕົວກ່ອນ ພ້ອມນໍາຕົວຜູ້ກ່ຽວເຂົ້າກວດຄົ້ນຫ້ອງພັກ ແລະ ກັກຕົວພັກພວກອີກຈຳນວນ 3 ຄົນ ພ້ອມຂອງຢາບ້າຈຳນວນດັ່ງກ່າວມາດຳເນີນຄະດີ.

cr :ນສພ ຄວາມສະຫງົບ