ກຣິສມັນແຮັບປີເມືອງນ້ຳຫອມຜ່ານເຂົ້າຮອບ 16 ທີມ ຢູໂຣ 2016

 

ອອງຕວນ ກຣິສມັນ ຫົວຫອກທີມຊາດຝຣັ່ງແຮັບປີສຸດຂີດຫຼັງຈາກທີ່ “ກາໄກ່” ຜ່ານເຂົ້າສູ່ຮອບ 16 ທີມສຸດທ້າຍຂອງ ຢູໂຣ 2016 ສຳເລັດຈາກການອັດ ອາວເບເນຍ 2-0 ພ້ອມທັງຍັງບອກອີກວ່າຮູ້ຢູ່ແລ້ວເປັນຕົວສຳຮອງງໃນເກມນີ້.

 

ອອງຕວນ ກຣິສມັນ ກອງໜ້າຂອງທີມຊາດຝຣັ່ງເປີດເຜີຍວ່າຮູ້ສຶກດີໃຈເປັນຢ່າງຍິ່ງທີ່ທີມຜ່ານເຂົ້າສູ່ຮອບ 16 ທີມສຸດທ້າຍຂອງລາຍການບານເຕະຊິງແຊມແຫ່ງຊາດເອີຣົບ “ຢູໂຣ 2016” ໄດ້ສໍາເລັດຫຼັງຈາກທີ່ທັບ “ກາໄກ່” ເອົາຊະນະ ອາວເບເນຍ 2-0 ໃນເກມຮອບແບ່ງກຸ່ມ ກຸ່ມ ອາ ນັດສອງທີ່ສະນາມ ສະຕາດ ເວໂລໂດຣມ ເມື່ອວັນພຸດທີ 15 ທີ່ຜ່ານມາ.

 

ເກມນີ້ຝຣັ່ງບຸກເກືອບຝ່າຍດຽວແຕ່ບໍ່ສາມາດຍິງປະຕູໄດ້ຈົນຮອດນາທີທີ່ 90 ພວກເຂົາມາໄດ້ປະຕູຂຶ້ນນຳ 1 - 0 ໄດ້ສໍາເລັດຈາກການໂໝ່ງຂອງ ກຣິສມັນ ກ່ອນທີ່ຈະມາໄດ້ລູກຢໍ້າໄຊ 2 – 0 ໃນຊ່ວງທົດເວລາບາດເຈັບຈາກການຍິງຂອງ ດິມິທຣີ ປາເຢດ ເຮັດໃຫ້ຕອນນີ້ “ກາໄກ່” ເກັບ 6 ແຕ້ມຈາກການລົງແຂ່ງສອງນັດຜ່ານເຂົ້າສູ່ຮອບຕັດເຊືອກຮຽບຮ້ອຍ.

 

“ເຮົາຈຳເປັນຕ້ອງຊະນະເພື່ອເຂົ້າຮອບ ແລະ ເຮົາກໍເຮັດໄດ້ສຳເລັດ ໂຄດ (ດິດີເຢ ເດຊອງ) ໄດ້ບອກກັບຂ້ອຍວ່າ ຂ້ອຍຈະເປັນຕົວສຳຮອງເກມນີ້ເຊິ່ງຂ້ອຍກໍຮູ້ດີໃນເລື່ອງນັ້ນ ແລະ ຂ້ອຍກໍຕ້ອງການເຮັດໃນສິ່ງທີ່ຂ້ອຍຕ້ອງເຮັດເມື່ອໄດ້ຮັບໂອກາດ” ແຄ່ງດາວດັງຈາກ ແອັດເລຕິໂກ ມາດຣິດ ເປີດໃຈ.