ກຣິສມັນເນື້ອຫອມ!! 4 ຍັກໃນແດນຜູ້ດີພ້ອມລ່າໂຕ

 

ອອງຕວນ ກຣິສມັນ ກອງໜ້າເລືອດນ້ຳຫອມຂອງ ແອັດເລຕິໂກ ມາດຣິດ ອາດຈະເປັນຂ່າວຍ້າຍທີມຮືຮາເມື່ອເຊື່ອວ່າທີມດັງໃນ ພຣີເມຍລີກ 4 ທີມທັງ ແມນເຊສເຕີ ຊີຕີ, ແມນເຊສເຕີ ຢູໄນເຕັດ, ເຊວຊີ ແລະ ອາເຊນອນ ພ້ອມຈ່າຍ 80 ລ້ານປອນເພື່ອດຶງເຂົາມາຮ່ວມທັບໃນລະດູການໜ້າ.

 

ອອງຕວນ ກຣິສມັນ ກອງໜ້າທີມຊາດຝຣັ່ງຂອງ ແອັດເລຕິໂກ ມາດຣິດ ກຽມກາຍເປັນຊະນວນໃຫ້ຍັກໃຫຍ່ໃນ ພຣີເມຍລີກ ທັງ ແມນຊີ, ແມນຢູ, ເຊວຊີ ແລະ ອາເຊນອນ ປະມູນຄ່າຫົວໄປຮ່ວມທີມໃນລະດູການໜ້າໂດຍຄ່າຫົວອາດຈະສູງເຖິງ 80 ລ້ານປອນ.

 

ກຣິສມັນ ຫາກໍເຮັດຂ່າວທີ່ຮືຮາໂດຍການປະກາດແຍກທາງກັບ “ກຣູໂປ້ ຊານໂຕສ” ບໍລິສັດນາຍໜ້າທີ່ດູແລເຂົາ ແລະ ຈະຂໍຈັດການອະນາຄົດຕົນເອງດ້ວຍຕົນເອງຮ່ວມກັບ ອະແລັງ ພໍ່ຂອງຕົນ ຂະນະດຽວກັນ ກຣິສມັນ ຍັງຖືກເບິ່ງວ່າມີໂອກາດຍ້າຍທີມສູງເມື່ອ ດີເອໂກ້ ຊິເມໂອເນ ນາຍໃຫຍ່ອາເຈັນຕິນາອອກມາຍອມຮັບແລ້ວວ່າມີການຫຼຸດໄລຍະເວລາຂອງສັນຍາຕົນເອງກັບທີມໃຫ້ສັ້ນລົງ 2 ປີເຊິ່ງຖ້າວ່າ ຊິເມໂອເນ້ ອຳລາທີມກໍມີໂອກາດທີ່ ກຣິສມັນ ຈະຍ້າຍເຊັ່ນກັນ.

 

ອະດີດາວເຕະ ເຣອັນ ໂຊເຊດາດ ຕົກເປັນຂ່າວວ່າຢູ່ໃນລາຍຊື່ນັກເຕະຂອງ ຢູໄນເຕັດ ຂະນະທີ່ ຊີຕີ ເຖິງວ່າຈະມີໂຕບຸກຫຼາຍ ແລະ ປີໃໝ່ຈະມີ ກາບຽວ ເຮຊຸດ ກອງໜ້າແຊມບ້າຍ້າຍມາອີກແຕ່ຖ້າວ່າ ກຣິສມັນ ຍ້າຍທີມໄດ້ພວກເຂົາກໍອາດຈະບໍ່ປ່ອຍໃຫ້ຫຼຸດມືໄປເຊັ່ນດຽວກັບ ເຊວຊີ ແລະ ອາເຊນອນ.

 

ບົດຄວາມໃຫມ່ໆ